9週第一次超聲波體驗

第一次照超聲波簡直係又期待又緊張，期待既係好想見到Bibi，緊張係因為擔心未有閃閃。9W第一日既晨早，我同Bibi爸都特登請假去診所照超聲波，聽人講飲多D水可以照得清楚D，出發前我先灌水，結果去到診所好急，不過都忍住，可能因為好早既關係，唔洗點等好快就到我地，醫生問左我幾條問題計下而家既週數同預產期，跟住就開始照超聲波。


情節同睇戲既一樣，一開始姑娘搽D暖暖地既啫喱係肚，跟住就開始用儀器周圍碌，醫生仲事先叫Bibi爸拎定手機出黎對住個螢光幕錄低，真係細心，不過照超聲波醫生第一句係話：咦，你有D急尿Wor。而我不斷點頭，其實心入面想講：係超急呀醫生。跟住醫生就開始介紹下我個肚入面有D咩，子宮出面黑色既係尿，入面係胎水，有營養囊，同埋胎囊，入面有一隻人仔，問我地見唔見到閃閃果舊野，我同Bibi爸都話睇唔到，跟住佢就放大比我地睇，嘩，傳說中既閃閃，真係一粒豆咁既Size係到閃下閃下，當下覺得好神奇，但到醫生播埋聲出黎，好快既卜卜卜聲，聽到既一刻有莫名既感動，感覺好實在，終於有一個小生命係我肚入面。


最後醫生有幫我檢查下子宮周圍，一切正常後醫生送左張超聲波相比我地，係第一張Bibi相，真係要好好珍而重之。照完閃閃可以話係過左第一關，不過我都係未放鬆過，因為仲要面對黎緊12W既唐氏檢查。離開診所搭車走既時候，Bibi爸拎返張超聲波相出黎比我睇，仲指住隻腳仔同我講：嘩，條小雞雞好似蘑菇。我偷笑左一下，同佢講：呢隻腳黎，未咁快睇到男定女架，不過細細粒好得意呀。跟住佢答我：下，好似外星人Wor！算，唯有當冇母愛既男人睇既野係唔同D。

第一次東區醫院產檢

比平時返工仲要早出門口既第一次產檢大約係10週既時候，未到9點我同Bibi爸已經到左東區醫院登記，原來已經有好多準媽媽都到左，我仲以為自己好早到可以快快手搞掂早D走添！之前用手機App 預約登記，一個星期左右收到SMS，入面提到帶身份証同懷孕証明就夠，由於好趕時間食唔切早餐，出發之前買左份三文治諗住一陣邊等邊食。

去到既時候第一時間去左專科大樓中央登記處登記新症，跟住佢比左張預約紙，叫我落2層去專科診所，要將預約紙放入去診所登記處(一入門口個Counter位置)既收集箱然後等嗌名。呢個時候，我同Bibi爸拎左份三文治出黎食，但全場既人都冇個好似我地2個餓鬼咁係到食野，結果樣衰咁輪住行出去等Lift位食。

坐左9個字大約9:45分，姑娘終於開始叫名，我係第3個，出去輪住度高磅重，跟住量血壓，然後就派左一堆小冊子同參考資料仲有幾張Form，搞掂完呢Part姑娘叫我慢慢填Form等入去抽血，仲話有排等，叫我睇哂D「德國麻疹」同「水痘」既小冊子，當我岩岩填完Form既時候就比人叫左去抽血，傻下傻下咁比人抽左2筒血，又話等好耐既喂?!D小冊子我仲未開始睇。

大約11:00既時候，終於可以入房見護士，急口令咁問左一大堆問題，上次幾時第一日黎M，有冇長期病，有冇藥物敏感，有冇出過水痘，係唔係自然懷孕，家族入面有冇人既BB係異常?!會唔會搵私家做nifty或者T21，要自己出去搵私家照結構等等…問完之後幫我計預產期，然後叫我出去等叫名預約下一次Oscar即係「度頸皮」時間，臨走前我問左句：請問會唔會出懷孕証明，因為我上次睇普通診所佢冇寫到預產期時間。跟住佢好大聲答我：冇架，等你陀穩先出。咁就比人趕走左，可能後面仲有好多人等緊。

小冊子入面有好多資訊，睇睇無妨

好記得11:30聽到自己個名，因為叫埋呢次可以走人喇，佢一次過出左2張預約紙比我，第一張係12週度頸皮，第二張係15週第一次見醫生。其實第一次產檢都冇咩野做過，又冇照超聲波，Bibi爸好無聊咁坐左一朝，辛苦哂！