必備五大懷孕APPS實用推介

作為一個新手媽媽，即使有左都機不離手，原因係手機可以分散注意力，有少少舒緩懷孕早期既不適同緊張既心情，一開始我自己搜羅左各類唔同既懷孕APPS，但最後發現只有幾個先會長用，所以真心推介以下幾個實用既APPS比新手媽媽。

1.「280days」

爸爸媽咪共用同一個帳號，入面既圖片同文字都非常得意，可以用黎預先set定產檢日期，紀錄產檢結果同埋上傳照片，我同Bibi爸都好鍾意放超聲波相做記錄，Bibi爸第一次用既時候睇到6週既虛擬bb係咁話：「唉呀，好得意好得意，好細粒呀」。個表情反應當正係佢個囡咁。

2.「Hapi Journey喜程」

呢個APP係我係醫院派既小冊子入面見到，香港都有唔少準媽媽推介，由醫管局出，內容好實用，非常岩香港既媽媽睇，入面提供好詳細既各大公立醫院服務，由產檢，入院分娩，走佬袋到產後出院須知都列明哂，最岩搭車冇野做既時候睇。

3.「Monny活寶兔記帳」

而家養一個BB應該唔止400萬喇，由開始知道有左已經洗費大左，身為窮媽媽既我一定會記錄洗左幾多，咁先可以係其他方面縮減少少平衡返，呢個APP真係幫左唔少，買左D咩可以即時用手機記低，有哂一個收入支出報表，列明得好清楚架。

4.「宮縮計時器&計算器」

又未穿水又未見紅但一肚痛起上黎唔知點算？當然最好馬上入院啦，不過有時想知係唔係假宮縮，呢個APP就有用喇，雖然佢既作用只係後期先發揮出黎，但起碼可以拎住部手機到入院一路計住宮縮時間，仲會提埋你入院要做好D咩準備，download定傍身呀。

5.「Timetree」

係Bibi爸搵到既，跟住幫我整埋，係一個目前用過最理想既行事曆，做左大肚婆的確冇咩記性，懷孕期間報左一堆產前講座，有D抽中有D唔中，幾時幾點出席等，一時間真係記唔哂，所以Bibi爸忍唔住搵左呢個APP比我記低哂，我一Mark低佢部手機都會即時收到。就算生完BB都仲要去健康院呀，幾時打針呀之類，呢個APP絕對可以長久咁用。 

懷孕早期及中期3個重要的超聲波檢查

一開始知道自己有左既時候，幾乎想日日都照超聲波睇下BB，又或者好有衝動想買部胎心機日日聽下心跳，總之成個人都變得好敏感，3日唔埋2日就會亂諗野。我打算係公立醫院生BB，所以整個孕期既產檢都會公立同私家兩邊走，穩陣D。

7-9 Weeks	照心跳	睇BB有冇心跳、宮外孕同單/雙胎	私家做 約$1000
12 Weeks	唐氏綜合症檢查	檢查BB患唐氏既機率	政府度頸皮 免費 私家做T21 約$6000
19-24 Weeks	照結構	睇BB身體器官發育齊唔齊全	私家做 約$3000

8W照心跳
建議留到8-9週去照，因為聽身邊媽媽講5-6週照唔到心跳會嚇餐飽，呢個檢查可以推斷預產期同埋睇下單胎定雙胞胎。我大約係9-10週既時候照心跳，記得當時Bibi比預產期細左一週，不過醫生有安慰我，話有機會遲排卵所以細左。

12W唐氏綜合症檢查
呢個檢查所有公立醫院都免費提供，準確度約8成，係12週既時候照超聲波量度BB頸皮厚度，加驗血結果同根據孕婦歲數，估計BB患唐氏綜合症既機會率。而我一早決定左會係私家做T21，所以護士只係幫我度頸皮冇抽血。
私家通常分左Nifty同T21，T21比較貴，同樣只需要抽血(唔需要空腹)幾日後就可以知道結果，準確度係99%。我當時冇特別比較過Nifty同T21，只係知道T21可以快D知道結果，所以就揀左，而我大約係抽血後3日收到醫生電話，知道報告正常同埋Bibi係囡囡。


20W照結構
照結構主要睇BB內臟，即心肝脾肺腎，腸，胃，膀胱，腦部，心房心室有冇問題等等，幾本上所有器官都會睇，另一方面睇下耳仔，手趾腳趾齊唔齊，有冇兔唇之類，仲會睇埋胎盤位置，子宮頸長短同羊水量，聽落去樣樣都好重要，真係是但一樣出問題都會嚇一跳。呢一Part對我黎講好緊張，照結構前一晚真係緊張到瞓唔好，好彩醫生真係照得非常細心，仲照埋3D比Bibi個樣我地睇，不過大部分都用手仔遮住左，可能第一次見面好怕醜。醫生將整個照結構既過程都錄低放入USB仲比埋影左既3D相我拎走，對於成日心掛掛既我黎講好有安撫作用。

過左照結構，心頭大石都放低左，因為20W後已經感覺到Bibi郁，唔再好似之前咁日日估下有冇長大到。我開始Feel到佢郁大約係19週，個感覺係之前未有過，所以如果想感受胎動既媽媽會好容易知道，我覺得好似有條好細好滑既羽毛係個肚入面滑過，又有時覺得好似有條魚仔係到吹泡泡，D水泡係個肚彈左幾下咁，平瞓最容易feel到，呵呵，好過癮架。