2019熱門產前講座及詳盡禮物一覧

上篇提到加入媽媽會主要目的都係為左參加產前講座，因為工作既關係，要出席哂咁多個講座真係唔夠時間，所以我一早上網搵定資料，睇下其他媽媽既心水推介而報名。揀得熱門推薦既講座，都係有好多人報名參加，我只有1個講座係第一次報名就抽中左，其他都報名超過2次以上，應該係我黑仔?! 好彩我係懷孕3個月既時候已經開始報名，好多講座都趕到係懷孕中期參加。

美素佳兒 (5月)

禮物：

1.       三角枕

2.       媽媽奶試用裝

3.       育兒書「愛心孕育篇」

第1次報名抽中，主要想要個三角枕，內容都算可以，分左兩Part，第一部分係營養師講懷孕期飲食及營養需要，第二部份係註冊護士示範嬰兒沖涼。返到屋企Bibi爸已經拆左個枕自己用，仲要唔跟原本既用法，不過個枕承拖力幾好。

美贊臣 (5月)

禮物：

1.       美贊臣圓形環保袋

2.       U型枕

3.       育兒書「孕育健康BB!醫生爸爸100個育兒你問我答書」

4.       Mustela試用套裝

5.       滴露消毒濕紙巾一包

6.       bb車掛袋

(仲有得即場試DHA同埋用$99就可以買媽媽藻油DHA)

第2次報名抽中，原本為左個U型枕去，但去到聽個講座內容好正，第一部分由婦產科醫生講解生產過程，順產同開刀點揀，仲有順產生BB既片睇，第二部分係由兒科醫生講解「初生嬰兒照顧小貼士」。U型枕一拎返到屋企就拆左黎用，我多數用黎做靠背。

雪印 (7月)

禮物：

1.       手挽式背囊

2.       扣針

3.       孕婦衛生巾試用裝

4.       SoftTouch清潔棉試用裝及優惠券

5.       思詩樂洗衣液及清潔棉(試用裝)

6.       Bio-Oil優惠券

7.       AQ空氣清新噴霧試用裝

8.       GOO.N尿片試用裝一塊

9.       Kinetics換領券換奶粉一罐

 第2次報名抽中，每兩個月舉行一次，講座內容少量廣告，不過資訊都有用，大致上同之前聽既講座差不多。禮物方面有張Kinetics換領券換左奶粉，Bibi爸話個背囊裝野唔錯，可以拎出街用，但拉鏈一般，有時會唔太順，其他禮物都係試用裝。

雅培 (7月)

禮物：

1.       雅培環保袋

2.       Lactacyd女性潔膚液試用裝

3.       Mustela試用裝一袋

4.       熊仔包被

5.       BRAUN耳溫槍優惠券及即用即棄耳套試用裝

6.       Kinetics換領券換細奶粉兩罐

第3次報名抽中，講座內容豐富實用，我同Bibi爸都學到野，中途同尾場會有試飲環節，我自己好鍾意下半Part由資深姑娘講解要用到既BB物品同媽咪坐月會用到既野，因為8月BB展諗住去掃貨。呢個講座都會有張Kinetics換領券換奶粉，熊仔包被質地好舒服，打算BB出院既時候用。

惠氏 (8月)

禮物：

1.       GOO.N尿片試用裝一塊

2.       Mustela試用裝一袋

3.       TanamerA薑及草本沐浴皂試用裝一塊

4.       Chopchop Babay BB手套

5.       惠氏Materna (10粒裝)

6.       惠氏DHA試用裝

7.       White Factor白因子消毒抗菌噴霧試用裝

8.       SoftTouch清潔棉試用裝

9.       思詩樂清潔棉試用裝

10.   萬潔靈除塵乾紙+除塵濕紙各一包

11.   惠氏奶粉Stage 1一罐(350g)

12.   Disney World English甜睡篇CD

第2次報名抽中，每兩個月舉行一次，一人一B湊B實習，每張圓枱大約坐8個人，位子唔逼坐得幾舒服。我覺得可以落手落腳試玩幾得意，幫BB著衫除衫同埋沖涼，雖然唔係真BB，但個實習BB都好可愛，玩下玩下時間幾快過，而且講座禮物都好多。

Kinetics (8月)

禮物：

1.       CheerBaby環保袋

2.       GOO.N尿片(初生、S及M)試用裝各一塊

3.       卡洛塔妮綜合羊奶片4粒

4.       Mustela試用裝一袋

5.       Kinetics換領券

6.       Mumomega佳孕素孕婦魚油丸1盒(30粒)

7.       生寶臍帶血庫紗巾一條

8.       Lactacyd女性潔膚液試用裝

9.       思詩樂清潔棉試用裝

10.   八珍二人份豬腳薑換領券一張

第4次報名抽中，呢個講座係我最想參加，主要目的想知道BB出世之後要打D咩疫苗針，同埋我一早已經諗定係Kinetics打，所以想知多D資訊，睇下佢地比既小冊子就知D疫苗針真係多到眼花，第2 Part內容講解要用到既BB物品，非常實用。而講座禮物亦相當吸引，Kinetics既講座當然有張Kinetics換領券，價值$400架，另外仲有八珍豬腳薑換領券一張，打算唔煲豬腳薑買現成既我黎講，十分之唔錯，有得試食先有得比較架嘛，仲有一盒魚油丸同其他牌子試用裝，足足一大袋。

MiDes (未知數???)

想參加但暫時仍未抽到，唔知生之前有冇緣可以出席到呢。

以上講座都係心水推介，無論係講座內容定禮物都係值得一去，但當然仲有好多牌子既講座如果有時間都可以去埋，聽多D當學多D。下面有幾個講座報左名但冇時間參加。

1.       敏兒安safeT21express及媽寶學院產前講座

2.       雀巢

3.       卡洛塔妮

4.            uBaby

終於28週之飲糖水日 - 妊娠期葡萄糖耐量測試

做第一次產檢既時候，姑娘話我糖尿係低風險，我天真地以為佢咁講即係唔洗做飲糖水測試，點知第二次產檢完，佢就出左個糖水期比我，我仲衰多口問姑娘原因，姑娘話冇得問點解，要飲就要飲！ ～～～係既！

一向鍾意食甜野既我，覺得飲一杯糖水係冇難度，但當身邊飲過糖水既媽媽同我講杯糖水係點難飲法既時候，我馬上驚左！



飲糖水前既兩個星期，除左食生果之外，我已經盡戒甜野，平時我好易血糖低以為唔易中，後來先知中妊娠糖尿同血糖低係兩回事，為左自己同BB健康，驚都唯有頂硬上啦。

終於來到飲糖水前一晚，12點後要禁食，一直空肚到第2朝完左個測試先可以食野。飲糖水既等待途中唔可以嘔，嘔左要再約期飲過。飲糖水當日，7點幾出門口既我已經好口渴，因為夜晚不斷起身小便，平時習慣左起身會飲水補充返水份，而家水都唔敢飲呀。

由於怕無聊既關係，所以拉埋Bibi爸同我一齊去，一到步東區醫院首先係樓下收費處登記左先，好彩早到咋，因為未夠鐘開閘已經排哂長龍，登記完上D7病房坐低等姑娘叫名，當日一間房大約有30位媽媽，但只有一位姑娘抽血，準備抽血前姑娘大聲問：有冇邊位係琴晚12點後到今朝有擺過野入口架? 如果有既話今日唔可以做呢個測試。打緊機既Bibi爸細細聲問我：我擺過牙膏入口咁算唔算。我笑鬼左，原本有D緊張，比佢搞一搞爛gag心情又好返少少。可能我早登記上去，所以好快已經到我抽血，抽完血自己拎一杯糖水返埋位飲。呢杯野同Starbucks既Tall size (約360ml)差唔多，唔係全滿，大約5分4杯糖水，糖水質地似一半糖漿加一半清水溝埋!?

飲糖水既流程好簡單：

1. 空腹抽第一次血

2. 10分鐘內飲完一杯糖水

3. 等2個鐘

4. 抽第二次血, 走得



我係有備而來既，自備左飲管一支，一開始飲糖水入口感覺良好，個口感就似飲緊茶餐廳既糖漿加水，又冇人地講既咁難飲wor，可能我口渴!? 但飲糖水真係唔可以飲太快，因為個質地有D"杰"，會容易令喉嚨唔舒服，由於我有飲管冇打開個杯蓋飲，所以聞唔到糖水係咩味，我估…應該係無咩味掛?! 飲到差唔多完既時候，有乸喉既感覺。我個人認為飲完既後續反應多D，飲完頭半個鐘有少少覺得頭暈，同埋胃氣多左，好易"er"氣，需要搵D野做分散下注意力。病房亦會播大約一個鐘既影片介紹下妊娠糖尿、產前、分娩及產後護理等，比各位媽媽消磨下時間。過左頭一個鐘，已經舒服返好多，可能落左格消化左部份糖水。

準備抽第2次血既時候姑娘同我地講：驗血結果會係今日大約4至5點出，如果中左妊娠糖尿既話今日就會收到電話通知見營養師。嘩，原來即日已經知結果，我仲以為起碼都要等1至2日，真係岩岩緊張完又再緊張。抽完第2次血，已經係中午12點幾，拎左盒奶同包梳打餅就走得喇，成個糖水測試真係需要一個早上。



Touch wood如果要我飲多次糖水，我應該冇之前咁怕，杯糖水真係唔算難入口，只不過有得揀，飲一次就夠哂，因為飲完當日完全唔想食甜野，而我當日下午亦冇收到醫院電話，証明我又過左一關啦，see，飲糖水又有咩好怕wor！！！

幾時先見肚? 懷孕第一次有人讓座的感覺

話說我25W仲未見肚，不過BB Size正常，我自己都好奇要去到幾多週人地先會覺得我大肚呢? 經過幾個星期既觀察後，我真正見肚大約係27W至28W，即係就7個月，先正式成為一名「大肚婆」。

由於要準備向公司申請產假既關係，陀到7個月既時候向同事公佈有左，佢地個表情好驚訝，以為我個肚係肚腩，就算知道左都覺得我個肚只有4-5個月，我本身瘦底，以為自己容易見肚，原來係錯架，只要唔著貼身衫，個肚隱藏得好好。

7個月未見肚之前，搭巴士地鐵未遇到讓座既情景，有時會無聊係到諗：如果有人讓座比我，我應該點講多謝好呢。又或者唔知讓座比我既會係男人定女人呢之類既搞笑問題。直到某一日…我終於體會到突然有人叫我坐低既感覺，嘩，可能好唔習慣既關係，第一個反應完全係「有D尷尬同唔係咁好意思」，讓座比我既係一位女中學生，不過我都反應慢半拍，拿拿聲講Thank you就坐低左。

第一次用大肚婆身份體會有人讓座係咁唔習慣，不過一次生兩次熟，之後有人再讓座比我已經冇咁尷尬既感覺。回想返懷孕5-6個月既時候，當時成日著鬆身衫既我個肚只係輕微突出，有時搭車搭地鐵，的確有人會眼望望我個肚，可能佢地都諗緊我呢個係咪肚腩，又好似想叫我坐又唔好意思叫咁，其實我本身冇唔舒服既話又或者只係搭幾個站，我都會靠埋一邊企，盡可能都唔企中間位置，感覺安全D，所以冇刻意企係當眼位置。可能一早已經習慣左搭車搭地鐵冇位坐既環境，所以就算大左肚有冇人讓座都唔會有hard feelings，不過有人讓座比自己，會有一剎那覺得呢個城市既人好有愛，哈哈。

25週由細碼BB升返1.8磅重中碼BB

對上一次20W照完結構之後，隔左5W後終於又可以見到Bibi，可能懷孕期間一直期望下一次照超聲波，回頭一望，其實時間過得好快，開始有D唔捨得。


話說Bibi一直係細碼既關係，我好努力用各種方法長胎，每日食烚蛋，一星期有2至3日飲滴雞精，甚至會飲加營素同桑寄生蛋茶當甜品，足足追碼追左半個孕期。黎到25W只係得個小肚腩，著闊身衫見唔到個肚突出黎，一直肚細細，唔講人地都唔知我有左，今次去照超聲波上磅既時候都係比一個月前重左1磅，到我見醫生既時候，我一坐低就問醫生：我個肚仲係好細呀，點算呀?!跟住醫生答我：BB仲細，慢慢會大架喇，同埋每個媽媽體質唔同，唔係用肚既大細黎評估BB Size。雖然醫生係咁講，但自己始終都擔心。


終於開始照超聲波，螢光幕一開始睇到今日係25W0D，醫生一開始度左Bibi個頭圍先，24W1D，細左一週，跟住再度腳長，24W4D，最後度肚仔，25W0D，終於有樣野係見到正常週數，醫生話：好好呀，BB吸唔吸收係睇個肚Size，如果佢吸收得唔好，會細個肚先，而家度到既Size好正常呀。醫生仲話BB重1.8磅，上返中碼Size，之後度心跳速度，羊水量足唔足夠同宮頸口有冇緊閉，最後醫生黎個3D比我地睇下Bibi個樣，我同Bibi爸都好期待呢一刻，因為上次結構Bibi用手遮面睇唔到，今次好少少啦，只係遮下巴，所以都睇得清楚個樣，而家得閒無事都會打開手機睇下張3D相過下癮滿足下，好想佢留到足月出黎，又好想早D見到Bibi，做左呀媽就係咁矛盾。

踏入左懷孕中後期，趕得切追返Size，至於BB頭仲係偏細，醫生話同遺傳有關，佢話我個頭都好細，但係Bibi爸個頭好大，哈哈，應該似我喇。我胃口一直都唔錯，重左一磅應該都只係重左係BB身上?! 希望靠住我既養胎方法可以一路Keep到生都係偏中碼Size啦。幾個星期後就要飲糖水啦，提起都心慌慌呀。

我的長胎三寶

由第一次8W照超聲波開始，Bibi已經比正常週數細，加上早期胃口差一直都好擔心佢吸收得唔好，有問過中西醫意見，亦都參考左同樣有類似經驗既媽媽做法，一直努力用各種方法長胎，足足追左半個孕期，終於去到25W再照既時候，先至追返正常既週數。所以就算一開始胎細都唔需要太擔心架，係有方法追得返，當然唔係食肥自己，但以下想講既長胎食物都係非常健康同有效，想長胎既媽媽不妨可以參考下。

烚蛋

水煮蛋係咁多種煮法入面最安全同健康，因為一定係全熟同保留既蛋白質最多，如果鐘意食烚蛋既媽媽可以一日兩隻，但建議食第2隻既時候唔食蛋黃，以免膽固醇過高，絕對係一個長胎不長肉既不二之選。未有Bibi之前我自己好鍾意食茶記既炒滑蛋，但因為炒蛋唔係全熟，有時就算叫左整反蛋或者全熟煎蛋，個蛋黃都係唔太熟，所以有左之後焗住每日都要食烚蛋，雖然食到口淡淡，不過為左BB都要食到生。

滴雞精

呢幾年新興既長胎之物絕對係滴雞精，雞湯有幾補身大家都知，如果係濃縮左既雞汁精華更加唔洗講，蛋白質超豐富，係補上加補既寶品，而且一包包獨立包裝好方便，好適合在職媽媽帶返工飲，所以吸引到咁多媽媽食用。我自己飲開王朝覺得入口可以，飲落口亦唔會覺得有雞油同腥既感覺，所以冇特別轉其他牌子。我係過左3個月先開始飲，到而家Keep住一星期大約有2至3日會飲，不過市面上牌子好多，雖然都係滴雞精，但口味亦會有少少出入，如果唔抗拒雞汁既準媽媽不妨可以先去下BB展試飲唔同牌子再落決定。

牛肉 / 豬肉 / 雞肉

蛋白質既來源一定離不開以上3種肉類，只要每餐適量食，絕對可以做到長胎效果，大前題係，食入口既肉一定要係全熟。而且呢幾類肉既鐵質都好豐富，懷孕中期到後期其實都好需要大量鐵質，幫助BB生長。係懷孕早期我因為體重唔達標被營養師召見，佢地話我知無論準媽媽肥定瘦，都絕對唔可以唔食肉 (素食者另計)，仲有每餐都要有肉，所以準媽媽唔好怕肥而唔食呀，其實飲食均衡既話真係可以做到只肥BB唔肥媽媽。

要長胎其實除左以上3種食物之外，都仲有好多選擇，當然每種食物都要睇返媽媽本身體質而決定可唔可以長期食用，唔識唔肯定既話問下醫生最安全。仲有瞓多D，做下伸展運動其實都可以長胎，就算努力左都仲係胎細其實唔需要擔心，生出黎儲肥佢都唔遲，最重要係成個孕期都保持樂觀既心情，開開心心生個健康BB先係首要任務呀!!

向妊娠紋SAY NO之盡早預防有效方法及防紋油&防紋霜推介

乜野係妊娠紋！？咪就係有BB既時候個肚大得制爆發出黎既肚紋，好多人都話會跟一世，如果皮膚唔夠彈性，本身乾燥，有橙皮紋，陀孖B，又或者自己媽咪當年都爆得勁既情況下，自己有妊娠紋既機會都較大。

一直係混合性皮膚既我由懷孕既一刻起，皮膚好明顯變得好乾同敏感，長期都好似處於一個「冬天乾燥肌」既狀態，但我明明就係春夏天陀B，係未有肚既時候，肚既周圍已經開始痕好似想甩皮，於是即刻上網搵資料同打電話問生過BB既朋友，得出左以下幾個有效既方法預防：

1. 控制體重

控制體重等於控制個肚脹大既速度，慢慢大好過突然脹大呀嘛！有早期孕娠反應既我開頭對於呢一點完全冇擔心過，體重有跌冇升，諗住到左中期都只不過升返平時正常既體重，原來係錯架！無論係早期胃口有幾差，只要一食返野，體重上升既速度係預計唔到，特別係好甜野，所以成個孕期都唔可以掉以輕心。

2. 搽防紋油及潤膚乳＋按摩

做左呢個步驟唔一定保證冇妊娠紋，但唔做而爆紋就一定非常後悔，保濕一定要做。除左肚之外，胸，腰，臀部，大脾內側都要保濕，記得打圈按摩，要完全吸收入皮膚先算搽左。市面上咩類型既防紋油或者防紋霜，潤膚乳都有，買既時候自己留意下入面既成分，又或者揀D孕婦專用，如果買左唔知用唔用得，做產檢既時候帶埋去問醫生啦。

3. 定期做適量運動
做運動聽落唔難，堅持做先難，大肚婆好多劇烈既運動都唔做得，每日散步已經係做左運動架喇，或者孕婦瑜伽都好適合，拉筋可以保持肌膚伸展度，仲可以預防抽筋，我每個星期都保持至少5日拉下筋，有效架。

4. 補充膠原蛋白增加皮膚彈性
食花膠係最簡單直接既方法，有豐富蛋白質同膠原，不過花膠好補，適量食，一星期一或兩次都夠架喇。除左花膠，其他天然食物都有膠原蛋白，好似牛奶，雞蛋呢類，就算唔食花膠都唔需要特別擔心覺得自己冇補充呢D營養，最緊要心情輕鬆。

妊娠紋產品推介（＊無廣告成分，自購品，個人分享）

妊娠紋產品方面我都有特別研究過，我主要揀既都係寫明「孕婦專用」或「孕婦適用」，一開始唔敢試用太多產品，因為係2個多月既時候，我個肚已經開始出現紅點同痕，完全處於一個敏感狀況，所以我都係經朋友用過後推介既。

Clarins：「調和身體護理油」同「抗紋身體乳霜」
質地：★★★★
吸收度：★★★★★
保濕度：★★★★★
CP值：★★★★

用後感：

夜晚沖完涼後油同霜一齊用，先搽油後搽霜。質地好夠潤，一齊用好足夠補濕，最緊要唔「笠」，呢個係非常重要，因為我好抗拒「笠痴痴」既感覺，而且要搽既地方又多，夏天又熱又笠既感覺真係唔好受。如果唔想左諗右諗，一開始試用呢2支都係一個唔錯既選擇，唯一缺點係售價偏高，用量平均用到2個月。


100%Pure：「蜜糖杏仁潤體霜」
質地：★★★
吸收度：★★★★
保濕度：★★★★★
CP值：★★★★

用後感：

標榜100%不添加人造香料、化學成分、有毒防腐劑及不安全成份，所以好安心使用，我通常日頭用只搽肚，質地偏厚，夠保濕，配合按摩吸收都唔錯，而且厚得黎唔「笠」，用量平均用到1.5個月，價錢較實惠。