未夠三個月講唔講好?

呢個問題應該好多人都會問，而我驗到有左就開始諗講唔講比屋企人聽好，亦上網睇過其他媽媽既意見，雖然傳統規矩都係話未夠三個月唔講得，但又有人覺得呢D係舊一輩既諗法。而我除左屋企長老之外，其他人都係選擇過左3個月先公佈，主要原因係我真係好驚青，當時未知BB有冇心跳，過唔過到唐氏，結構會唔會有問題，越諗越擔心，所以決定叫Bibi爸都一齊忍口唔講。

屋企人

我係同老爺佢地一齊住，日頭我返工，夜晚係長老煮飯，經常煲湯會落薏米或者赤小豆之類，去濕嘛，飲左幾次覺得唔對路，去左搵中醫把脈，中醫話我脈搏好弱唔靚，開左藥比我安胎，隔左冇幾耐孕娠反應來料，一聞到屋企飯就想嘔，連廚房都踏入唔到，冇辦法之下就同左長老講有左，胃口差食唔到晚飯，同埋煲湯唔好落去濕既藥材。頭3個月我每晚收工都閉關，外賣M記，KFC同譚仔酸辣米線，呢D都係唯一食得落既食物。

而我自己既屋企人就一個都冇講，媽咪同婆婆都係3個月後先知，原因係之前有屋企人流過既經驗，為免又多個人擔心同傷心，所以我等T21出左先公佈。

公司

香港始終在職媽媽都唔少，早D講早D保障自己呢樣絕對係真既，不過最重要既因素都係睇工作環境同自己健康狀況而決定，如果經常出Trip，返夜更，出入地盤，長時間企又或者要搬野既工作，一定要盡早通知公司，免死金牌事小，陀得隱先係事大。而我既工作都冇以上既問題，所以除左上司知道之外，其他人都冇講，人事部都係過左3個月先通知。

雖然好多人我都係過左3個月先講，但懷孕係一件開心事，如果唔想自己收收埋埋搞到唔開心，可以早D同人分享，自己心情都會好D，身邊既人會就住你，有好多野其實唔洗憂慮太多，順其自然，保持心境開朗做個開心孕婦。