向妊娠紋SAY NO之盡早預防有效方法及防紋油&防紋霜推介

乜野係妊娠紋！？咪就係有BB既時候個肚大得制爆發出黎既肚紋，好多人都話會跟一世，如果皮膚唔夠彈性，本身乾燥，有橙皮紋，陀孖B，又或者自己媽咪當年都爆得勁既情況下，自己有妊娠紋既機會都較大。

一直係混合性皮膚既我由懷孕既一刻起，皮膚好明顯變得好乾同敏感，長期都好似處於一個「冬天乾燥肌」既狀態，但我明明就係春夏天陀B，係未有肚既時候，肚既周圍已經開始痕好似想甩皮，於是即刻上網搵資料同打電話問生過BB既朋友，得出左以下幾個有效既方法預防：

1. 控制體重

控制體重等於控制個肚脹大既速度，慢慢大好過突然脹大呀嘛！有早期孕娠反應既我開頭對於呢一點完全冇擔心過，體重有跌冇升，諗住到左中期都只不過升返平時正常既體重，原來係錯架！無論係早期胃口有幾差，只要一食返野，體重上升既速度係預計唔到，特別係好甜野，所以成個孕期都唔可以掉以輕心。

2. 搽防紋油及潤膚乳＋按摩

做左呢個步驟唔一定保證冇妊娠紋，但唔做而爆紋就一定非常後悔，保濕一定要做。除左肚之外，胸，腰，臀部，大脾內側都要保濕，記得打圈按摩，要完全吸收入皮膚先算搽左。市面上咩類型既防紋油或者防紋霜，潤膚乳都有，買既時候自己留意下入面既成分，又或者揀D孕婦專用，如果買左唔知用唔用得，做產檢既時候帶埋去問醫生啦。

3. 定期做適量運動
做運動聽落唔難，堅持做先難，大肚婆好多劇烈既運動都唔做得，每日散步已經係做左運動架喇，或者孕婦瑜伽都好適合，拉筋可以保持肌膚伸展度，仲可以預防抽筋，我每個星期都保持至少5日拉下筋，有效架。

4. 補充膠原蛋白增加皮膚彈性
食花膠係最簡單直接既方法，有豐富蛋白質同膠原，不過花膠好補，適量食，一星期一或兩次都夠架喇。除左花膠，其他天然食物都有膠原蛋白，好似牛奶，雞蛋呢類，就算唔食花膠都唔需要特別擔心覺得自己冇補充呢D營養，最緊要心情輕鬆。

妊娠紋產品推介（＊無廣告成分，自購品，個人分享）

妊娠紋產品方面我都有特別研究過，我主要揀既都係寫明「孕婦專用」或「孕婦適用」，一開始唔敢試用太多產品，因為係2個多月既時候，我個肚已經開始出現紅點同痕，完全處於一個敏感狀況，所以我都係經朋友用過後推介既。

Clarins：「調和身體護理油」同「抗紋身體乳霜」
質地：★★★★
吸收度：★★★★★
保濕度：★★★★★
CP值：★★★★

用後感：

夜晚沖完涼後油同霜一齊用，先搽油後搽霜。質地好夠潤，一齊用好足夠補濕，最緊要唔「笠」，呢個係非常重要，因為我好抗拒「笠痴痴」既感覺，而且要搽既地方又多，夏天又熱又笠既感覺真係唔好受。如果唔想左諗右諗，一開始試用呢2支都係一個唔錯既選擇，唯一缺點係售價偏高，用量平均用到2個月。


100%Pure：「蜜糖杏仁潤體霜」
質地：★★★
吸收度：★★★★
保濕度：★★★★★
CP值：★★★★

用後感：

標榜100%不添加人造香料、化學成分、有毒防腐劑及不安全成份，所以好安心使用，我通常日頭用只搽肚，質地偏厚，夠保濕，配合按摩吸收都唔錯，而且厚得黎唔「笠」，用量平均用到1.5個月，價錢較實惠。

懷孕中期牙痛

話說天生牙齒弱雞既我，由一打算計劃生BB就已經開始檢查牙齒洗定牙，要補牙既通通都補好，心諗應該可以平安渡過十個月喇掛，點知去到中期都係瀨野，牙痛真係慘過大病，何況係大肚婆牙痛呢！

懷孕早期同後期其實都唔太適合整牙，因為太過緊張既心情容易引起宮縮，而脫牙更加係要落麻醉藥，唔係間間診所肯做，所以如果真係牙齒有問題，痛到頂唔順，問左自己既婦產科醫生先，再去睇牙醫。

我由15weeks開始刷牙就流牙血，去到18weeks開始牙痛，真係嚇死寶寶了，18weeks已經牙痛，幾時捱到生呀，每晚刷牙既時候係牙齒酸加牙肉痛，好怕係蛀牙或者發炎，我過往已經有時不時牙痛既經驗，所以一牙痛即時諗方法補救，開始每晚Keep住試左幾個方法，終於冇左酸痛，但用牙線依然都會流血。

1.      補「鈣」

呢個好重要，要講3次，一定要補鈣呀！缺鈣係牙齒弱既其中一個主要原因，我一開始好老定，以為日日飲鈣思寶加其他天然野食就足夠，因為我吞唔到大大粒既Supplements，所以冇食鈣片之類，就係咁，瀨哂野，BB真係會毫不留情咁吸鈣。跟住我就即時周圍搜羅睇下有咩辦法，終於發現原來係有鈣粉呢一樣野，我都覺得自己好落後，於是就趁5月Sogo thankful week既時候，係Catalog掃左6個月份量既鈣粉。早上飲鈣思寶，中午同晚上食完飯後補鈣粉，一定要分開補，鈣每次吸收有限，補多會自己排出黎，冇用架，補左一個星期，我D牙真係冇左痛，之後Keep住日日補鈣，Work。

2.      含「鹽水」

呢招中醫師教既，記得一開始唔係漱口水咁用呀，每晚刷完牙之後，落幾匙鹽加少少暖水，搞溶左含住D鹽水，含10分鐘，之後再用鹽水漱口幾次，鹽水消炎真係唔錯架，喉嚨痛都係用呢個方法，但記得唔係一晚半晚，Keep住做呀。

3.      用「牙線」

以前成日聽用牙線有效過刷牙，用牙線真係可以減少蛀牙既機會，所以有左唔想蛀牙，記得每晚要用牙線，我有左之後刷牙都會流牙血，而家刷牙冇再流喇，但用牙線都係會流血，不過比之前刷牙流既輕微好多，用完牙線感覺好乾淨，懷孕期間牙齒都會好弱，所以用牙線亦係一個好好保護既方法。